ಭಾರತದ ಷೇರು ಮಾರುಕಟ್ಟೆಯಲ್ಲಿ ಚಿನ್ನ ಮತ್ತು ಬೆಳ್ಳಿ ಇಟಿಎಫ್ಗಳು ಶುಕ್ರವಾರ ಭಾರೀ ಕುಸಿತಕ್ಕೆ ಸಾಕ್ಷಿಯಾಗಿದ್ದು, ಇಂಟ್ರಾಡೇ ವಹಿವಾಟಿನಲ್ಲಿ 14% ನಷ್ಟವನ್ನು ಅನುಭವಿಸಿವೆ. ದಾಖಲೆಯ ಮಟ್ಟಿಗೆ ಏರಿಕೆಯಾಗಿದ್ದು ಅಮೂಲ್ಯ ಲೋಹಗಳ ಬೆಲೆ ಏರಿಕೆಯಿಂದಾಗಿ ಹೂಡಿಕೆದಾರರು ಪ್ರಾಫಿಟ್ ಬುಕಿಂಗ್ಗೆ ಮುಂದಾಗಿದ್ದಾರೆ. ಬೆಳ್ಳಿ ಬೆಲೆಯು ಜನವರಿ ತಿಂಗಳಿನಲ್ಲೇ 50% ನಷ್ಟು ಬೆಲೆ ಹೆಚ್ಚಾಗಿದೆ.
ಭಾರತ ಅಷ್ಟೇ ಅಲ್ಲದೆ ಅಂತರಾಷ್ಟ್ರೀಯ ಮಟ್ಟದಲ್ಲಿ ಚಿನ್ನ & ಬೆಳ್ಳಿ ಸೇರಿದಂತೆ ಅಮೂಲ್ಯ ಲೋಹಗಳ ಬೆಲೆ ಭಾರೀ ಪ್ರಮಾಣದಲ್ಲಿ ಏರಿಕೆಗೊಂಡಿದೆ. ಅದ್ರಲ್ಲೂ ಜನವರಿ ತಿಂಗಳಿನಲ್ಲಿ ಚಿನ್ನ ಹಾಗೂ ಬೆಳ್ಳಿ ಬೆಲೆ ಗಗನಕ್ಕೇರಿದೆ. ಹೀಗಿರುವಾಗ ಶುಕ್ರವಾರ(ಜ.30) ಗಗನಕ್ಕೇರುತ್ತಿದ್ದ ಚಿನ್ನ ಮತ್ತು ಬೆಳ್ಳಿಯ ಬೆಲೆಗಳು ಹೂಡಿಕೆದಾರರಿಗೆ ಆಘಾತ ನೀಡುವಂತೆ ದಿಢೀರ್ ಕುಸಿತ ಕಂಡಿವೆ.
ವಿಶೇಷವಾಗಿ ಇತ್ತೀಚಿನ ವಹಿವಾಟಿನಲ್ಲಿ ಚಿನ್ನ ಮತ್ತು ಬೆಳ್ಳಿಯ ಇಟಿಎಫ್ಗಳು (Exchange Traded Funds) ಶೇಕಡಾ 14 ರಷ್ಟು ಕುಸಿತ ಕಂಡಿದ್ದು, ಮಾರುಕಟ್ಟೆಯಲ್ಲಿ ತಲ್ಲಣ ಸೃಷ್ಟಿಯಾಗಿದೆ. ಈ ಕುಸಿತಕ್ಕೆ ಪ್ರಮುಖ ಕಾರಣಗಳೇನು ಮತ್ತು ಹೂಡಿಕೆದಾರರು ಈ ಸಂದರ್ಭದಲ್ಲಿ ಏನು ಮಾಡಬೇಕು ಎಂಬುದರ ಕುರಿತು ತಜ್ಞರ ಅಭಿಪ್ರಾಯವನ್ನು ಮುಂದೆ ತಿಳಿಯಬಹುದು.
ಸಿಲ್ವರ್ & ಗೋಲ್ಡ್ ಇಟಿಎಫ್ ಕುಸಿತದ ಪ್ರಮುಖ ಅಂಕಿ-ಅಂಶಗಳು
ಶುಕ್ರವಾರದ ವಹಿವಾಟಿನಲ್ಲಿ ಸಿಲ್ವರ್ ಇಟಿಎಫ್ಗಳು (Silver ETFs) ಭಾರಿ ಮಾರಾಟದ ಒತ್ತಡಕ್ಕೆ ಸಿಲುಕಿ ಸುಮಾರು ಶೇ.12 ರಿಂದ 14 ರಷ್ಟು ಕುಸಿತ ಕಂಡವು. ಇದೇ ವೇಳೆ ಗೋಲ್ಡ್ ಇಟಿಎಫ್ಗಳು (Gold ETFs) ಕೂಡ ಶೇ.6 ರಿಂದ 10ರಷ್ಟು ಇಳಿಕೆಯಾಗಿವೆ.
ಜೆರೋಧಾ ಸಿಲ್ವರ್ ಇಟಿಎಫ್ ಮತ್ತು ಎಸ್ಬಿಐ ಸಿಲ್ವರ್ ಇಟಿಎಫ್: ಶೇ. 14 ರಷ್ಟು ಕುಸಿತ.
ನಿಪ್ಪಾನ್ ಇಂಡಿಯಾ ಸಿಲ್ವರ್ ಇಟಿಎಫ್: ಶೇ. 14 ರಷ್ಟು ಇಳಿಕೆ.
ನಿಪ್ಪಾನ್ ಇಂಡಿಯಾ ಗೋಲ್ಡ್ ಇಟಿಎಫ್: ಶೇ. 10 ರಷ್ಟು ಕುಸಿತ.
ಗೋಲ್ಡ್ & ಸಿಲ್ವರ್ ಇಟಿಎಫ್ ಕುಸಿತಕ್ಕೆ ಪ್ರಮುಖ ಕಾರಣಗಳು.
ಈ ದಿಢೀರ್ ಬೆಲೆ ಇಳಿಕೆಗೆ ಜಾಗತಿಕ ಮತ್ತು ದೇಶೀಯ ಮಾರುಕಟ್ಟೆಯ ಹಲವು ಬೆಳವಣಿಗೆಗಳು ಕಾರಣವಾಗಿವೆ:
1) ಪ್ರಾಫಿಟ್ ಬುಕಿಂಗ್:
ಕಳೆದ ಕೆಲವು ತಿಂಗಳುಗಳಿಂದ ಚಿನ್ನ ಮತ್ತು ಬೆಳ್ಳಿ ಬೆಲೆಗಳು ಸಾರ್ವಕಾಲಿಕ ಗರಿಷ್ಠ ಮಟ್ಟದಲ್ಲಿದ್ದವು. ಬೆಳ್ಳಿ ಜನವರಿಯಲ್ಲಿ ಶೇ. 56 ರಷ್ಟು ಏರಿಕೆ ಕಂಡಿದ್ದರೆ, ಚಿನ್ನ 1980ರ ನಂತರದ ಅತಿ ದೊಡ್ಡ ಮಾಸಿಕ ಏರಿಕೆಯನ್ನು ಕಂಡಿತ್ತು. ಹೀಗಾಗಿ ಹೂಡಿಕೆದಾರರು ಭಾರೀ ಏರಿಕೆಗೊಂಡಿರುವ ಇಟಿಎಫ್ ಪ್ರಾಫಿಟ್ ಬುಕಿಂಗ್ಗೆ ಮುಗಿಬಿದ್ದಿದ್ದರಿಂದ ಬೆಲೆಗಳು ಇಳಿದಿವೆ.
2)ಯುಎಸ್ ಫೆಡ್ ನಿರ್ಧಾರ ಮತ್ತು ಡಾಲರ್ ಮೌಲ್ಯದ ಪರಿಣಾಮಗಳು:
ಅಮೆರಿಕದ ಫೆಡರಲ್ ರಿಸರ್ವ್ (Fed) ಅಧ್ಯಕ್ಷರ ಆಯ್ಕೆ ಕುರಿತ ಊಹಾಪೋಹಗಳು ಮತ್ತು ಬಡ್ಡಿದರ ಕಡಿತದ ನಿರೀಕ್ಷೆಗಳಲ್ಲಿನ ಬದಲಾವಣೆಗಳು ಡಾಲರ್ ಮೌಲ್ಯವನ್ನು ಬಲಪಡಿಸಿವೆ. ಡಾಲರ್ ಮೌಲ್ಯ ಏರಿದಾಗ, ಅಂತರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಚಿನ್ನ ಮತ್ತು ಬೆಳ್ಳಿ ಬೆಲೆಗಳು ಸಾಮಾನ್ಯವಾಗಿ ಇಳಿಯುತ್ತವೆ.
3) ಟ್ರಂಪ್ ಹೇಳಿಕೆ ಮತ್ತು ಆರ್ಥಿಕ ಬದಲಾವಣೆ:
ಡೊನಾಲ್ಡ್ ಟ್ರಂಪ್ ಅವರ ಆರ್ಥಿಕ ನೀತಿಗಳ ಬಗ್ಗೆಗಿನ ಸುಳಿವುಗಳು ಮತ್ತು ಫೆಡ್ ಅಧ್ಯಕ್ಷರ ಬದಲಾವಣೆಯ ಸುದ್ದಿಗಳು ಹೂಡಿಕೆದಾರರಲ್ಲಿ ಅನಿಶ್ಚಿತತೆ ಮೂಡಿಸಿದ್ದು, ಅವರು ಸುರಕ್ಷಿತ ಹೂಡಿಕೆಗಳಿಂದ ಹಣ ಹಿಂತೆಗೆಯಲು ಕಾರಣವಾಯಿತು.
4) ಟೆಕ್ನಿಕಲ್ ಕರೆಕ್ಷನ್
ಯಾವುದೇ ಸರಕು ಸತತವಾಗಿ ಏರಿಕೆ ಕಂಡಾಗ ಮಾರುಕಟ್ಟೆಯಲ್ಲಿ ‘ಕರೆಕ್ಷನ್’ ಅಥವಾ ಬೆಲೆ ತಿದ್ದುಪಡಿ ಸಹಜ. ಚಿನ್ನ ಮತ್ತು ಬೆಳ್ಳಿ ಎರಡೂ ‘ಓವರ್ ಬಾಟ್’ (ಅತಿಯಾಗಿ ಖರೀದಿಸಲ್ಪಟ್ಟ) ಸ್ಥಿತಿಯಲ್ಲಿದ್ದವು.
ಹೂಡಿಕೆದಾರರು ಈ ಕುಸಿತವನ್ನು ಬಳಸಿಕೊಳ್ಳಬೇಕೇ?
ಮಾರುಕಟ್ಟೆ ತಜ್ಞರ ಪ್ರಕಾರ, ದೀರ್ಘಕಾಲದ ಹೂಡಿಕೆದಾರರಿಗೆ ಇದು ಅತ್ಯುತ್ತಮ ಅವಕಾಶವಾಗಿರಬಹುದು.
ದೀರ್ಘಕಾಲಿಕ ದೃಷ್ಟಿಕೋನ: ಚಿನ್ನ ಮತ್ತು ಬೆಳ್ಳಿಯ ಮೂಲಭೂತ ಮೌಲ್ಯ ಮತ್ತು ಜಾಗತಿಕ ಬೇಡಿಕೆ ಹಾಗೆಯೇ ಇದೆ. ಸಣ್ಣ ಅವಧಿಯ ಇಳಿಕೆಗಳು ದೊಡ್ಡ ಏರಿಕೆಗೆ ಮುನ್ನುಡಿಯಾಗುವ ಸಾಧ್ಯತೆ ಇರುತ್ತದೆ.
ವಿವೇಚನೆಯ ಹೂಡಿಕೆ: ಒಂದೇ ಬಾರಿಗೆ ಭಾರಿ ಮೊತ್ತವನ್ನು ಹೂಡುವ ಬದಲು, ಹಂತ ಹಂತವಾಗಿ (SIP ಮಾದರಿಯಲ್ಲಿ) ಹೂಡಿಕೆ ಮಾಡುವುದು ಸೂಕ್ತ.
ಅಪಾಯ ನಿರ್ವಹಣೆ: ಮಾರುಕಟ್ಟೆಯಲ್ಲಿ ಈಗ ಅಸ್ಥಿರತೆ (Volatility) ಹೆಚ್ಚಿರುವುದರಿಂದ, ಹಣಕಾಸು ಸಲಹೆಗಾರರ ಅಭಿಪ್ರಾಯ ಪಡೆದು ಹೂಡಿಕೆ ಮಾಡುವುದು ಉತ್ತಮ
ಒಟ್ಟಾರೆಯಾಗಿ ಚಿನ್ನ ಮತ್ತು ಬೆಳ್ಳಿಯ ಬೆಲೆಗಳಲ್ಲಿನ ಈ ಕುಸಿತವು ಅಲ್ಪಾವಧಿಯ ಪ್ರಾಫಿಟ್ ಬುಕಿಂಗ್ನಿಂದ ಉಂಟಾಗಿದ್ದು, ಬೆಲೆಗಳು ಮತ್ತೆ ಪುಟಿದೇಳುವ ಸಾಧ್ಯತೆಗಳಿವೆ. ಬಜೆಟ್ ಘೋಷಣೆಗಳು ಮತ್ತು ಜಾಗತಿಕ ರಾಜಕೀಯ ವಿದ್ಯಮಾನಗಳು ಮಾರುಕಟ್ಟೆಯ ಮುಂದಿನ ದಿಕ್ಕನ್ನು ನಿರ್ಧರಿಸಲಿವೆ.
ಇದೇ ರೀತಿ ನಿಮಗೆ ಇಂತಹ ವಿಷಯಗಳನ್ನು ಬೇಕಾಗಿದ್ದಲ್ಲಿ ಈ ಲಿಂಕ್ ಅನ್ನು ಕ್ಲಿಕ್ ಮಾಡಿ https://inspirationinsights.in/